CALENDARIO, TEMPO, DÍAS DA SEMANA, MESES DO ANO...

O noso rexistro do tempo

Cada mañá, na aula, dedicamos un anaquiño a observar o ceo e descubrir que tempo fai. Rexistramos no noso calendario mensual do tempo, unha rutina sinxela que nos permite traballar moitas aprendizaxes de maneira significativa.

Este momento tamén nos serve para orientarnos no calendario: repasamos que día é, en que mes estamos e que día da semana corresponde, afianzando pouco a pouco estes conceptos tan importantes en 1º de Primaria.

Pero o noso rexistro non remata aí.  Ao finalizar cada mes, observaremos todos os datos recollidos e faremos as nosas primeiras estatísticas: contaremos cantos días fixo sol, cantos choveu ou cantos estiveron anubrados, compararemos cantidades e analizaremos os resultados. Así, a partir dunha rutina diaria, achegámonos tamén á interpretación de datos e á matemática dunha maneira moi visual e próxima.

E como aprender cantando sempre resulta máis divertido, deixámosvos tamén as cancións dos días da semana e dos meses do ano que estamos utilizando na aula, para que poidan escoitalas e practicalas tamén na casa.

Pouquiño a pouco, entre calendarios, cancións, observacións e números, seguimos aprendendo a organizar e comprender o tempo que nos rodea.